Obradoiros de saúde emocional, artes escénicas, Desing Thinking, cuantificación de gases de efecto invernadoiro ou videocreción, visitas culturais na cidade de Lugo e a centros sanitarios e a empresas tecnolóxicas agroalimentarias completan a programación do Campus XuvenCiencia 2023

O Campus de Verán XuvenCiencia 2023 chega cun bo número de novidades no que respecta aos obradoiros e actividades de tarde que se ofertarán na presente edición. Introducimos para o alumnado que se sume do 2 ao 8 de xullo ao noso campamento científico obradoiros de saúde emocional e de coidados básicos de emerxencias, impartidos desde a Escola de Enfermaría do Campus de Lugo, e tamén unha actividade de Desing Thinking, creatividade no ámbito do emprendemento, que estará a cargo da Facultade de Administración e Dirección de Empresas. Asemade, o laboratorio de PEMADE (Plataforma de Enxeñaría da Madeira Estrutural) impartirá unha actividade sobre a xestión sustentable das plantacións de madeira para a construción.

Estas novas propostas engádense a outras de probado éxito ao longo das dez edicións anteriores do Campus de Verán XuvenCiencia e que inclúen obradoiros para a cuantificación de gases de efecto invernadoiro no edificio CACTUS do Campus de Lugo da USC ou de introdución ao teatro e á danza, no ámbito das  artes escénicas, e de videocreación para a divulgación científica. A proposta escollida para as tardes de XuvenCiencia combina o percorrido polo Hospital Veterinario Rof Codina, á Aula de Habilidades Clínicas da Facultade de Veterinaria e á Aula de Produtos Lácteos e tamén unha exhibición sobre as tecnoloxías do futuro (robótica ou realidade aumentada, por exemplo) na Escola Politécnica Superior de Enxeñaría.

Conscientes da importancia do sector agroalimentario e agroindustrial e das súas ligazóns coas investigacións que se realizan no Campus de Lugo da USC, o alumnado de XuvenCiencia2023, de entre 15 e 19 anos, poderá coñecer tamén as empresas Leite Larsa, Xenética Fontao e Finsa. O programa non desbota tampouco as propostas de tipo cultural e igualmente se ofertarán dúas visitas para achegarnos ao patrimonio da cidade de acollida do campus de verán: o centro histórico de Lugo e os seus tres patrimonios da humanidade e o Museo da Domus do Mitreo, o xacemento arqueolóxico do templo dedicado ao deus Mitra máis occidental do Imperio Romano.

Programa

Esta serie de actividades e obradoiros inclúense no Campus XuvenCiencia en horario de tarde, despois do xantar e da realización dos proxectos pola mañá. O programa de XuvenCiencia 2023 comezará o luns 3 de xullo ás 9.30 horas cunha gran xincana que terá como escenario todos os edificios do Campus de Lugo da USC, co obxectivo de que o alumnado rompa o xeo e se coñeza entre si e que, ao tempo, se familiarice coa que será a súa casa durante a semana. Os 16 proxectos de mañá, para grupos de 5 e 6 persoas, e os obradoiros e actividades de tarde sucederanse durante as xornadas do martes, mércores e xoves, para rematar a undécima edición de XuvenCiencia o venres 7 de xullo á tarde, co Festival de Vídeos XuvenCiencia, a entrega de premios Aresa Junior e Proxéctate en Galego e, por suposto, a XuvenFesta por todo o alto.