As persoas participantes poderán coñecer de primeira man os procedementos actuais empregados na investigación punteira en enerxías mariñas para optimizar o deseño de convertidores de enerxía undimotriz. A través da súa modelaxe física nun canle de ondas, simularase o comportamento destes dispositivos en condicións reais de ondaxe, achegando a enxeñaría oceánica de forma práctica e visual.

 

Seguindo un modelo desenvolvido na Universidade de Davis, presentarase un simulador de mapas topográficos en 3D interactivo, que se actualiza en tempo real cando o usuario manipula o terreo. Ademais, poderase simular a escorrentía de augas provocada pola chuvia, permitindo entender de maneira lúdica e intuitiva procesos fundamentais da hidroloxía e da xeografía.

 

Nesta actividade, as persoas asistentes poderán experimentar de maneira práctica cos fundamentos da robótica aplicada. A través da programación e do control de brazos robóticos, explorarán os principios básicos do movemento automatizado e a súa aplicación en diferentes ámbitos da enxeñaría e da industria.