P12 Divulgando activamente: arte, cultura e ocio a golpe de clic

Obxectivo
Se nunca pensaras que se pode falar de arte, cultura e entretemento desde puntos de vista innovadores, entretidos e divertidos, especialmente co uso da tecnoloxía; definitivamente, agardámoste neste Proxecto sobre divulgación!
Lugar de realización
Facultade de Humanidades e Museo Provincial de Lugo
Descrición
Preguntácheste algunha vez como contar un tema que coñeces moito para que outra persoa o entenda de maneira doada, e non o conseguiches? Quizais es ti a persoa que leu, ou á que lle contaron algo deste modo e, non só non conseguiches entender, senón que te sentiches frustrado/a por non facelo. Se a túa resposta é “si”, este Proxecto é para ti. Aínda máis, se nunca pensaras que se pode falar de arte, cultura e entretemento desde puntos de vista innovadores, entretidos e divertidos, especialmente co uso da tecnoloxía; definitivamente, agardámoste neste Proxecto sobre divulgación!
Imos aprender, pero, sobre todo, imos facer. Teremos o privilexio de estar nas aulas da universidade e no Museo Provincial de Lugo, onde levaredes adiante o voso “traballo de campo” para dar forma ao proxecto. Cambiaremos as gafas desde as que miramos a divulgación sobre a arte e a cultura para fomentar a súa difusión. Non tes que saber de arte, só tes que querer “divertirte facendo” coas túas compañeiras e compañeiros.
Traballaremos en grupo catro puntos clave para a divulgación cultural na Rede: que é divulgar e cales son os perfís profesionais que se poden adaptar, así como as canles desde as que poderedes facelo; traballaremos coas ferramentas narrativas que fan posible a divulgación desde a práctica; dedicaremos tempo á importancia do deseño gráfico nos materiais que se publican, así como da maquetación, a corrección de textos, o uso legal de imaxes na Rede; e, finalmente, traballaremos no deseño dun plan editorial que fará que todo o traballado se poida materializar. A partir de aquí, teremos as pezas do “quebracabezas da divulgación”.